Përveç 246 raketave antitank Javelin që duhet të mbërrijnë nga SHBA, Ministria e Mbrojtjes së Kosovës ka bërë të ditur se planifikon të blejë edhe armatime të tjera.
Mirëpo, këshilltarja politike e ministres së Mbrojtjes së Kosovës, Liridona Gashi, tha për Radion Evropa e Lirë se nuk mund të zbulojë se për çfarë prokurimi bëhet fjalë për “informacion konfidencial”.
Ajo ka thënë se kërkesa për blerjen e raketave Javelin është dorëzuar në bazë të planit të mëparshëm dhe se nuk është reagim ndaj “sulmit shqetësues në Banjskë në veri të Kosovës më 24 shtator dhe kërcënimeve të vazhdueshme nga Serbia”.
