Po shpërngulen banorët e parë në qytetin-laborator: Me taksi fluturuese dhe makina pa shoferë, shumica të punësuar në të njëjtën kompani.

“Woven City” është një qytet-laborator që kompania japoneze Toyota po e ndërton gjatë tre viteve të fundit në shpatet e malit Fuji në Japoni, në vendin e ish-uzinës së prodhimit të makinave në Susono.

Ky projekt interesant, me vlerë 10 miliardë dollarë, është konceptuar si një poligon për testimin e automjeteve autonome që mund të lëvizin pa asnjë kontroll njerëzor, si dhe për zgjidhje të tjera inovative të mobilitetit.
“Woven City është më shumë se një vend për të jetuar, punuar dhe luajtur. Është një vend ku njerëzit mund të shpikin dhe të zhvillojnë produkte dhe ide të reja të çdo lloji. Është një laborator i gjallë ku banorët janë të gatshëm të marrin pjesë, duke u dhënë shpikësve mundësinë të testojnë lirisht idetë e tyre në një mjedis të sigurt – të rrethuar nga jeta reale,” tha së fundmi Akio Toyoda, presidenti i Toyotës.

“Woven City” do të shtrihet në 0,7 kilometra katrorë dhe për dizajnin e tij është përgjegjëse studioja arkitekturore daneze “BIG.”

Banorët e parë të “Woven City”
Sipas informacioneve të disponueshme, njëqind banorët e parë do të shpërngulen në “Woven City” këtë vjeshtë. Fillimisht do të përbëhen kryesisht nga vullnetarë të kompanisë Toyota, të cilët dëshirojnë të punojnë në dizajnimin e zgjidhjeve më të qëndrueshme, më të zgjuara dhe më përfshirëse për mobilitetin.

Ata do të ndahen në dy grupe: shpikës qëllimi kryesor i të cilëve është dizajnimi i produkteve të reja dhe thurës (weavers) të cilët do t’i testojnë ato në kohë reale.
Në qytet do të testohen pajisje inovative për mobilitetin personal, shërbime të dorëzimit me dronë, robotë shoqërues për të moshuarit, madje edhe transport me taksi fluturuese.
Popullsia e “Woven City” do të rritet gradualisht në përputhje me zhvillimin e infrastrukturës së qytetit dhe deri në vitin 2026 pritet të përfshijë rreth 2,000 njerëz.