Me rastin e 15-vjetorit të anëtarësimit të Shqipërisë në NATO, kryeministri Edi Rama deklaroi se vendi i tij është krenar që kontribuon në mbrojtjen dhe sigurinë kolektive.
– Ky 15-vjetor i anëtarësimit të Shqipërisë në NATO nuk është vetëm një festë e arritjeve tona të së shkuarës, por edhe një riafirmim i përkushtimit tonë të palëkundur ndaj parimeve dhe vlerave që mbështesin Aleancën tonë. Gjatë 15 viteve të fundit, Shqipëria ka kontribuar me krenari në mbrojtjen dhe sigurinë kolektive të NATO-s dhe ne mbetemi të palëkundur në angazhimin tonë për të mbështetur paqen dhe vlerat demokratike në të gjithë rajonin tonë dhe më gjerë, shkruan Rama në platformën X.
Ai tha se Shqipëria është e nderuar të qëndrojë krah për krah me aleatët, mbi të gjitha me SHBA-në, duke falënderuar Sekretarin e Shtetit Anthony Blinken për mesazhin e urimit.
– Faleminderit Sekretar Blinken. Ne jemi të nderuar të qëndrojmë krah për krah me aleatët tanë, mbi të gjitha Shtetet e Bashkuara të Amerikës, ndërsa vazhdojmë të përshtatemi dhe forcojmë bashkëpunimin tonë përballë sfidave globale. Ne presim shumë vite të tjera bashkëpunimi të frytshëm brenda familjes së NATO-s. Faleminderit për aleancën, miqësinë dhe partneritetin, shkruan Rama.
Shqipëria dhe Kroacia u bënë anëtare të plota të NATO-s në prill 2009 pasi ata dorëzuan dokumentet e tyre të ratifikimit në Uashington.
