Çmimet e naftës ranë sot nën 63 dollarë për fuçi në tregjet ndërkombëtare, pasi investitorët u shqetësuan nga shenjat e përshkallëzimit të tensioneve tregtare ndërmjet Shteteve të Bashkuara dhe Kinës.
Në tregun e Londrës, çmimi i një fuçie naftë pasdite ishte 2,49 dollarë më i ulët krahasuar me ditën e djeshme, duke arritur në 62,73 dollarë. Ndërsa në tregun amerikan, nafta u tregtua me 2,60 dollarë më lirë, në 58,91 dollarë për fuçi.
Rënia e çmimeve erdhi pasi SHBA vendosi sanksione ndaj disa anijeve dhe kompanive, përfshirë një rafineri të pavarur kineze, me arsyetimin se kishte blerë miliona tonë naftë iraniane që nga viti 2023.
Sipas analistëve, përshkallëzimi i tensioneve tregtare mund të ngadalësojë ekonominë globale dhe të ulë kërkesën për energji.
Ndërkohë, OPEC njoftoi se çmimi i fuçisë së naftës së përbashkët të vendeve anëtare u rrit dje me 17 centë, duke arritur në 67,09 dollarë, raporton Indeks.hr.
