DUKAGJIN, 22 Dhjetor 2025 – Ish-komandanti i Njësisë Speciale “Shqiponjat e Zeza”, Idriz Balaj, ka vizituar familjen e Selami Haxhikadrisë, e cila njihet historikisht si furnizuesja e parë e uniformave për këtë njësi elitare të Ushtrisë Çlirimtare të Kosovës (UÇK).
Themeli i njësisë në ditët më të vështira
Përmes një postimi në rrjetet sociale, Balaj ka kujtuar fillimet e majit të vitit 1998 brenda Zonës Operative të Dukagjinit (ZOD). Në një kohë kur furnizimet ishin pothuajse zero dhe rreziku nga forcat serbe ishte në çdo hap, lindi nevoja për një njësi që do të vepronte në pikat më të nxehta të frontit.
“I paraqita idenë Ramush Haradinajt. Ai më dëgjoi dhe më tha thjesht: ‘Bëje’. I thashë se nuk dua lavdi para kohe, puna do të tregojë gjithçka,” kujton Balaj bisedën me komandantin e zonës.
Detaji i veçantë: Pantallonat e zeza të Ramush Haradinajt
Një nga detajet më interesante që Balaj ka zbuluar është se si u zgjodh simbolika e ngjyrës së zezë për njësinë. Ai tregon se në atë kohë, i kishte kërkuar vetë Ramush Haradinajt pantallonat që mbante veshur, vetëm sepse ishin të zeza dhe i përshtateshin vizionit të tij për njësinë speciale.
Mirënjohje për familjen Haxhikadria
Vizita në familjen Haxhikadria ishte një akt nderimi për kontributin e tyre të heshtur por jetik. Kjo familje ishte e para që mundësoi qepjen dhe furnizimin me uniformat e zeza, të cilat më vonë do të bëheshin tmerri i forcave pushtuese në zonën e Dukagjinit.
