Agjencia e Statistikave të Kosovës (ASK), pas përfundimit të regjistrimit të popullsisë, amvisërive dhe banesave, i cili ka zgjatur nga 5 prilli deri më 24 maj, vlerëson se Kosova do të ketë rreth një milion e 600 mijë banorë, njoftoi korrespondenti i MPB-së së Prishtinës. .
Ushtruesi i detyrës së drejtorit ekzekutiv të ASK-së, Avni Kastrati, sot në një konferencë për media tha se të dhënat zyrtare do të publikohen në mesin e korrikut të këtij viti.
“Të dhënat do të publikohen në gjysmën e parë të korrikut, por në bazë të ditëve të fundit të procesit, si dhe shtesës që është bërë, pritshmëria është që Kosova të ketë rreth 1.6 milionë banorë”, tha Kastrati.
Ai bën të ditur se deri më tani në diasporë janë regjistruar rreth 600 mijë persona, por ky numër me siguri do të jetë më i madh duke pasur parasysh se regjistrimi për atë kategori është zgjatur deri në fund të gushtit. Kastrati ka thënë se në të gjithë procesin e regjistrimit të popullsisë janë përfshirë rreth 5100 persona dhe vlerësimi i ASK-së është se procesi ka kaluar pa probleme.
