Pas takimit me Kurtin në Prishtinë, në një intervistë për RTK-në e Kosovës, ai deklaroi se beson se një nga tre funksionet kryesore të shtetit, kryetari i Kuvendit, do të vazhdojë të jetë shqiptar dhe Vlen do të marrë edhe 6 poste ministrore, të cilat, siç thotë ai, do të plotësohen me ekspertë nga radhët e tyre. Taravari pret që Kuvendi të konstituohet në fund të këtij muaji dhe qeveria e re të formohet në gjysmën e parë të qershorit. Ndryshe, në takim, Kurti i ka uruar për rezultatet e zgjedhjeve, me vlerësimin se për herë të parë opozita shqiptare ka fituar mbi 100 mijë vota.
VMRO-DPMNE nuk zbulon më shumë detaje rreth negociatave dhe zgjidhjeve kadrore, por presin që të bëhet një kontratë cilësore. Sekretari për bashkëpunim ndërkombëtar i partisë, Stefan Andonovski, në një intervistë për REL tha se Mickoski përveç formimit të qeverisë është duke negociuar edhe për arritjen e shumicës prej dy të tretash në Kuvend për reforma të rëndësishme, ndër të cilat është edhe transformimi i Ministria aktuale e Sistemit Politik e drejtuar nga Artan Grubi.
Negociatat e grupeve punuese ndërmjet VMRO-DPMNE-së dhe “VLEN”, sipas njoftimeve do të vazhdojnë nesër për të finalizuar programin qeveritar, ndërsa deri të premten pritet që të merren vesh për zgjidhjet kadrore. Ndërkohë ditën e mërkurë do të ketë rivotim në shtatë qendra votimi në njësinë zgjedhore 5 dhe 6 për të parë shpërndarjen përfundimtare të forcave në Kuvend.