Ndërsa presidenti rus Vladimir Putin ndoqi paradën në Kinë dhe forcat e tij vazhdonin të sulmonin qytetet ukrainase, presidenti amerikan Donald Trump deklaroi se është “shumë i zhgënjyer” nga kreu i Kremlinit dhe paralajmëroi se planifikon të ndërmarrë “diçka” në ditët e ardhshme lidhur me këtë çështje.
“Jam shumë i zhgënjyer nga presidenti Putin, mund ta them këtë”, tha Trump më 2 shtator në emisionin radiofonik të Scott Jennings, kur u pyet nëse ndjehet i tradhtuar nga veprimet e Putinit pas samitit të tyre në Alaskë më 15 gusht.
“Kishim marrëdhënie shumë të mira, por tani jam i zhgënjyer. Mijëra njerëz po vdesin. Nuk janë amerikanë, por rusë dhe ukrainas. Dhe kjo është një luftë që nuk ka kuptim,” shtoi ai.
“Do të bëjmë diçka për t’i ndihmuar njerëzit të jetojnë. Shtatë mijë njerëz po vdesin çdo javë – kryesisht ushtarë. Dhe nëse mund të ndihmoj të ndalet kjo, mendoj se kam detyrimin ta bëj,” tha Trump, pa dhënë detaje.
Trump, i cili e ka vendosur përfundimin e luftës së Rusisë në Ukrainë si prioritet kryesor të administratës së tij, shprehu zhgënjim gjithnjë e më të madh për refuzimin e Putinit që të pranojë një armëpushim ose të takohet me presidentin ukrainas Volodymyr Zelensky.
Ndërkohë, forcat ruse vazhduan të sulmonin qytetet ukrainase, duke shkaktuar viktima civile dhe dëme në infrastrukturë, edhe teksa zhvillonin aksione tokësore kundër ushtrisë më pak të pajisur dhe të furnizuar të Ukrainës.
Sulmet vazhduan herët më 3 shtator, kur autoritetet raportuan një tjetër sulm me dronë mbi kryeqytetin Kiev dhe njoftuan se janë lëshuar alarme ajrore në mbarë vendin.
Timur Tkachenko, shefi i administratës ushtarake të kryeqytetit, tha se “mbrojtja ajrore po funksionon në Kiev. Qëndroni në strehimore derisa të jepet leja”.
Detajet nuk ishin menjëherë të disponueshme.
Trump premtoi se do të vendosë tarifa të reja doganore ose sanksione kundër Moskës nëse ajo nuk lëviz drejt paqes, megjithëse deri tani është përmbajtur nga çdo veprim konkret. Aleatët evropianë të Uashingtonit dhe Kievit më herët kanë vendosur një seri sanksionesh të ashpra ndaj Rusisë pas pushtimit të Ukrainës në shkurt 2022.
Një ditë më herët, sekretari amerikan i Thesarit, Scott Besant, në një intervistë për Fox News tha se administrata këtë javë do të shqyrtojë opsionet për reagimin e SHBA-së ndaj sulmeve më të fundit të Rusisë.
Putin “bëri të kundërtën e asaj që i kishte thënë presidentit Trump se donte të bënte,” tha Besant.
“Në fakt, ai, në mënyrë përçmuese, e intensifikoi fushatën e bombardimeve. Prandaj, mendoj se me presidentin Trump të gjitha opsionet janë në tavolinë dhe do t’i shqyrtojmë shumë seriozisht këtë javë,” shtoi Besant.
Komentet vijnë ndërsa Putin merrte pjesë në një paradë ushtarake në Kinë për 80-vjetorin e kapitullimit të Japonisë, që shënoi fundin e Luftës së Dytë Botërore. Lideri i Kremlinit tha se lidhjet me Pekinin tani janë në një “nivel të paparë”, gjë që ka shqetësuar disa liderë perëndimorë.
Megjithatë, Trump në intervistën radiofonike tha: “Nuk jam aspak i shqetësuar, jo.”
“Ne aktualisht kemi ushtrinë më të fortë në botë dhe ata kurrë nuk do ta përdornin ushtrinë e tyre kundër nesh. Besomëni, kjo do të ishte gjëja më e keqe që ata mund të bënin,” shtoi ai.
Në anën tjetër të frontit diplomatik, aleatët evropianë të Kievit në të ashtuquajturën “Koalicioni i Vullnetit” – i udhëhequr nga presidenti francez Emmanuel Macron dhe kryeministri britanik Keir Starmer – pritet të takohen në Paris më 4 shtator për të diskutuar mbi garancitë e mundshme të sigurisë për Ukrainën.
“Bashkë me partnerët tanë dhe në koordinim me NATO-n, do të punojmë për të përcaktuar garanci të forta sigurie për Ukrainën. Këto janë një parakusht i domosdoshëm për një lëvizje të besueshme drejt paqes,” shkroi Macron në X pas bisedimeve me shefin e NATO-s, Mark Rutte.
Ndërkohë, Zelensky përsëriti paralajmërimet e tij se forcat ruse po përgatiten për një ofensivë të re në lindje të Ukrainës.
“Tani shohim një rritje të forcave ruse në disa sektorë të frontit. Putin refuzon të detyrohet drejt paqes,” tha Zelensky në fjalimin e tij të mbrëmjes, pa dhënë detaje.
“Rusia vazhdon të kryejë sulme. Sigurisht, ne do të përgjigjemi ndaj tyre,” shtoi Zelensky pas një tjetër serie sulmesh vdekjeprurëse ndaj qyteteve ukrainase, përfshirë kryeqytetin Kiev.
Më 29 gusht, Zelensky gjithashtu paralajmëroi se një ofensivë e re ruse është e pashmangshme.
“Përqendrimi i trupave ruse atje arrin deri në 100.000,” tha ai, duke iu referuar vijave të frontit pranë qytetit strategjik Pokrovsk.
