Në kuadër të Tetorit Rozë, muajit ndërkombëtar të ndërgjegjësimit për kancerin e gjirit, Forumi i Gruas i koalicionit VLEN organizoi sot një aktivitet sensibilizues në Matkë, ku mori pjesë edhe kandidati për kryetar të Komunës së Sarajit, Muhamet Elmazi.
Ngjarja u zhvillua në një atmosferë miqësore dhe frymëzuese, duke bashkuar gra të komunitetit, profesionistë shëndetësorë dhe përfaqësues politikë, në një kauzë të përbashkët për shëndetin dhe jetën.
Mesazhe për kujdes, vetëkontroll dhe mbështetje
Në aktivitet morën pjesë deputetja Feride Haxhiu, gjinekologia Meral Uzeiri Ferati dhe bartësi i listës, Amir Idrizi, të cilët ndanë mesazhe inkurajuese për kontroll të rregullt mjekësor, informim dhe kujdes të vazhdueshëm ndaj shëndetit të grave.
“Kujdesi për shëndetin nuk është luks, por domosdoshmëri. Çdo grua duhet të jetë e vetëdijshme për rëndësinë e kontrollit të hershëm dhe mbështetjes së ndërsjellë,” – theksuan pjesëmarrëset.
Elmazi: “Shëndeti i gruas është shëndeti i familjes sonë”
Në fjalimin e tij, kandidati i VLEN-it për Saraj, Muhamet Elmazi, nënvizoi se forca e shoqërisë fillon me kujdesin për nënën, motrën dhe vajzën.
“Shëndeti i gruas është shëndeti i familjes dhe i shoqërisë sonë. Ne duhet të krijojmë një mjedis ku çdo grua ndihet e sigurt, e përkrahur dhe e motivuar të kujdeset për veten,” – u shpreh Elmazi.
Në përmbyllje të ngjarjes, ai dha një mesazh frymëzues për bashkim dhe qëndresë:
“Bashkë për jetë, shëndet dhe fitore më 19 tetor!”
Ngjarje me simbolikë dhe qëllim të qartë
Aktiviteti u mbyll me ecje simbolike dhe shpërndarje të fjongo rozë, si shenjë ndërgjegjësimi dhe solidariteti me të gjitha gratë që përballen me sfidën e kancerit të gjirit.
Forumi i Gruas i VLEN-it njoftoi se gjatë gjithë muajit tetor do të zhvillohen fushata ndërgjegjësuese dhe takime edukative në disa komuna të vendit.
