Meta ka prezantuar veçorinë e re “bisedat e palëve të treta” për përdoruesit e WhatsApp në Bashkimin Evropian. Falë saj, përdoruesit do të mund të komunikojnë me persona që përdorin aplikacione të tjera të mesazheve, për sa kohë që këto shërbime janë të ndërveprueshme me WhatsApp.
Në muajt në vijim, nisja e bisedave do të jetë e mundur me përdoruesit e BirdyChat dhe Haiket, partnerët e parë në këtë proces. Meta thekson se veçoria është rezultat i tre viteve bashkëpunimi me kompanitë evropiane të mesazheve dhe Komisionin Evropian, duke garantuar pajtueshmëri me Aktin e Tregjeve Digjitale (DMA) dhe ruajtjen e privatësisë.
