Bekim Jashari i ka uruar ditëlindjen babait të tij, heroit Hamëz Jashari, i cili do të mbushte sot 76 vjet. Përmes një postimi në Facebook, ai ka ndarë emocione të forta dhe kujtime të paharrueshme për figurën e babait të tij, i cili ra heroikisht në marsin e vitit 1998 në Prekaz, së bashku me familjen. Lajmin e transmeton portali KOHANEWS.
Në mesazhin e tij, Bekimi ka theksuar se koha për Hamëz Jasharin është ndalur në moshën 48-vjeçare, kur ai vendosi të sakrifikojë jetën për lirinë e shqiptarëve.
“Sot do t’i mbushje 76 vjet. Ishe vetëm 48 vjeç kur, në marsin e vitit 1998, në Prekaz, bashkë me familjen, vendose të biesh për Liri. Sot je më i ri se unë, sepse për ty është ndalur koha, kurse për ne të vdekshmit po ecën shpejt”, ka shkruar ai.
Bekimi shtoi se babai i tij ishte i dashur dhe i afërt me familjen, por zgjodhi të mos ishte vetëm i tyre, duke u bërë simbol i të gjithë shqiptarëve. Ai kujtoi se dashuria dhe mirësia e Hamëz Jasharit vazhdojnë të përcillen tek ai, motra Besarta dhe nipat e mbesat e familjes Jashari.
👉 Ditëlindja e 76-të e Hamëz Jasharit është një moment reflektimi dhe krenarie për gjithë kombin, duke rikujtuar se liria e Kosovës u fitua me gjakun dhe sakrificën e familjes Jashari.
