Krerët e Komitetit Olimpik Ndërkombëtar (KON) kanë marrë një vendim që i lejon yllit holandez të patinazhit të shpejtë, Jutta Leerdam, të vazhdojë me veprimin e saj tashmë të famshëm: zbërthimin e pjesës së sipërme të kostumit pas garës. Edhe pse ky veprim është cilësuar si “kontrovers” për shkak të ekspozimit të qëllimshëm të sponsorëve privatë, organizatorët nuk shohin shkelje të rregullave.
Marketingu pas “zbërthimit”
Jutta Leerdam ka tërhequr vëmendje të madhe me mënyrën se si e menaxhon imazhin e saj. Sapo kalon vijën e mbërritjes, ajo zbërthen veshjen e saj aerodinamike për të shfaqur veshjet e brendshme me simbolin e prodhuesit “Nike”.
Ky veprim ka ngritur dyshime për një konflikt interesi, pasi Federata Holandeze e Patinazhit bashkëpunon me brendin “FILA”, ndërsa Leerdam ka një kontratë private miliona dollarëshe me gjigantin amerikan “Nike”.
Shifrat marramendëse pas imazhit të saj
Ekspertët e marketingut sportiv vlerësojnë se përfitimet e Juttas janë kolosale:
-
Kontrata me Nike: Përfiton rreth 850,000 euro në vit.
-
Rrjetet Sociale: Çdo postim i sponsorizuar në Instagram mund t’i sjellë rreth 62,000 euro, duke marrë parasysh numrin e saj të madh të ndjekësve.
-
Fuqia e çiftit: Lidhja e saj me boksierin dhe influencuesin Jake Paul (i cili ka rreth 29 milionë ndjekës) e rrit shumëfish vlerën e saj në tregun global.
Vendimi i Komitetit Olimpik
Përkundër kritikave se ky është një truk i pastër marketingu, Anne-Sophie Voumard, drejtoresha e marketingut në KON, u shpreh:
“Nuk jam eksperte e patinazhit, por e kuptoj që zbërthimi i kostumit pas garës është diçka normale për patinatorët, pasi veshja është shumë e ngushtë. Është një praktikë e zakonshme dhe jo domosdoshmërisht një truk marketingu.”
Kujtojmë që në Lojërat Olimpike Dimërore “Cortina & Milan 2026”, Jutta Leerdam shkëlqeu duke fituar medaljen e artë në 1.000 metra dhe medaljen e argjendtë në 500 metra, duke vërtetuar se përveç imazhit, ajo mbetet mbretëresha e akullit.
