Sekretariati i Përgjithshëm i Qeverisë do të shpenzojë 80.000 euro për t’i dërguar administratorët e tij në “team-building” treditor në Ohër, Berovë dhe Strumicë.
Në shpalljen e publikuar në faqen e furnizimeve publike, kërkohen hotele me minimum katër yje, dy pansionet të plota për punonjësit dhe autobusë të lartë turistikë për transport nga “Ilindenska” deri te hotelet. Dhomat do të jenë njëkrevatëshe. Vlera e parashikuar e furnizimit publik është 5.000.000 denarë.
Afati i fundit për aplikimin e hotelierëve dhe transportuesve të interesuar është 4 marsi. Si kriter për përzgjedhjen e ofertuesve është rregulluar çmimi më i ulët.
“Team-building”, sipas përshkrimit në thirrje, është i destinuar për punë në zyra, marrëdhënie me publikun dhe të tjera. Janë planifikuar shtatë grupe administratorësh nga Sekretariati i Përgjithshëm i Qeverisë, secili me nga 15-25 dëgjues.
