Ministri i Transformimit Digjital, Stefan Andonovski, paralajmëroi se brenda këtij viti pritet digjitalizimi i plotë i rreth 30 shërbimeve të reja, duke filluar nga regjistrimi i të porsalindurve brenda 48 orëve e deri te shërbimet e Fondit Shëndetësor. Krahas vendosjes së terminaleve elektronike në pikat më të frekuentuara, prioritet mbetet ngritja e Qendrës së Inteligjencës Artificiale “Vezillka” dhe ndërtimi i një modeli gjuhësor maqedonas. Sipas tij, numri i përdoruesve të portalit e-shërbime ka shënuar rritje rekord prej 150%, duke e rikthyer vendin në hartën e vendeve të zhvilluara digjitalisht.
Lidhur me iniciativën “Roaming si në shtëpi”, Andonovski theksoi se Maqedonia e Veriut është ndër vendet më të përgatitura në rajon për harmonizimin me rregulloret e BE-së. Megjithëse procesi varet nga dakordimi dypalësh dhe dinamika evropiane, projeksionet optimiste parashikojnë që deri në fund të vitit 2026 ose 2027, qytetarët do të mund të udhëtojnë në vendet e Bashkimit Evropian pa kosto shtesë për thirrje dhe internet.
Ky hap synon lehtësimin e komunikimit dhe eliminimin e tarifave të larta për të gjithë udhëtarët tanë në Evropë.
