Trajneri i Hoffenheimit, Christian Ilzer, ka konfirmuar rikthimin e plotë të mesfushorit shqiptar Leon Avdullahu. Ky lajm vjen si një frymëmarrje për ekipin, ku pjesë kryesore janë edhe dy reprezentuesit e Kosovës, Fisnik Asllani dhe Albian Hajdari.
Hoffenheim, 9 prill 2026 – Përpara ndeshjes hapëse të xhiros së 29-të të Bundesligës kundër Augsburgut, trajneri Christian Ilzer u shfaq optimist për gjendjen fizike të Avdullahut. Mesfushori, i cili la pas një lëndim, është stërvitur rregullisht me grupin gjatë gjithë javës.
Ilzer: Avdullahu është i gatshëm
Trajneri i skuadrës gjermane theksoi se aktivizimi i tij në ndeshjen e kaluar ndaj Mainzit ishte një hap i rëndësishëm drejt rikuperimit të plotë.
“Ishte e rëndësishme që Leon Avdullahu të luante gjysmë ore kundër Mainz. Ai ka marrë pjesë plotësisht në stërvitje gjatë gjithë javës. Pas stërvitjes së fundit do të vendosim nëse ai do të jetë titullar apo do ta nisë nga stoli”, deklaroi Ilzer në konferencën për shtyp.
“Kolonia” shqiptare te Hoffenheimi
Ndeshja e së premtes pritet të ketë një vëmendje të shtuar nga sportdashësit tanë, pasi te Hoffenheimi po shkëlqejnë edhe dy emra të tjerë të rëndësishëm:
-
Fisnik Asllani dhe Albian Hajdari pritet të jenë titullarë të padiskutueshëm në formacionin e Ilzer.
-
Leon Avdullahu, i cili këtë sezon ka regjistruar 29 paraqitje në të gjitha garat, synon të rimarrë vendin e tij në qendër të mesfushës.
Sfida ndërmjet Hoffenheimit dhe Augsburgut luhet të premten duke filluar nga ora 20:30. Një fitore eventuale do t’i ndihmonte skuadrës së futbollistëve tanë të ngjitet më lart në tabelën e klasifikimit në fazën përfshirëse të kampionatit gjerman.
