TIRANË – Rolando Maran është zyrtarisht trajneri i ri i Kombëtares së Shqipërisë, duke u bërë tekniku i katërt italian që merr në dorë timonin e kuqezinjve. Përveç kombësisë dhe objektivave të mëdha, Maran ndan një histori mjaft interesante me dy paraardhësit e tij të njohur, Xhani De Biazi dhe Edi Reja.
Pika e përbashkët që bashkon të tre këta teknikë në karrierën e tyre në Itali është klubi i njohur i Breshias (Brescia Calcio). Përpara se të uleshin në stolin e Shqipërisë, që të tre kanë drejtuar skuadrën e “Dallëndysheve”:
-
Edi Reja e ka drejtuar Breshian gjatë sezonit 1996–1997.
-
Xhani De Biazi udhëhoqi stolin e këtij ekipi për dy sezone, përgjatë viteve 2003–2005.
-
Rolando Maran ishte në krye të Breshias në periudhën e fundit, midis viteve 2023–2025.
Konsultimet me mikun e vjetër, De Biazi
Gjatë konferencës së tij të parë për shtyp ku u prezantua zyrtarisht përpara mediave, tekniku 62-vjeçar pranoi se përpara se të merrte vendimin për të pranuar ofertën e Federatës Shqiptare të Futbollit, ka kontaktuar me njeriun që bëri historinë duke kualifikuar Shqipërinë në Euro 2016.
Maran zbuloi se me De Biazin ka një miqësi të ngushtë dhe se këshillat e tij do t’i shërbejnë shumë në këtë aventurë të re:
“Kam folur me De Biazin, përderisa është një mik i mirë. Është një trajner që e vlerësoj shumë për atë që ka dhënë këtu. Më ka dhënë disa indikacione dhe këshilla mjaft të rëndësishme, të cilat i vlerësoj maksimalisht”, deklaroi Maran.
Me këtë emërim, Shqipëria rikthehet sërish te shkolla italiane e futbollit, duke shpresuar që rrugëtimi i Maranit të ketë të njëjtin sukses dhe peshë historike si ai i mikut të tij, Xhani De Biazi.
