Futbollistët e Sileksit dhe Shkëndijës së Tetovës sonte, me fillim nga ora 20:00 në arenën “Todor Proeski”, do të zhvillojnë ndeshjen finale të Kupës së Maqedonisë së Veriut.
Kratovasit në përballjen e rëndësishme të asaj mbrëmjeje do të tentojnë ta fitojnë këtë trofe për herë të katërt në historinë e klubit, ndërsa Shkëndija në koleksionin e saj ka dy kupa dhe synon të tretën.
Lufta për histori në listën e përjetshme
Nëse Sileksi arrin të ngjitet në fron, do të barazohet me Rabotniçkin për nga numri i trofeve të fituara dhe do të ndajë vendin e tretë në listën e përjetshme të skuadrave më të suksesshme në Kupë.
Nga ana tjetër, me një triumf të mundshëm, Shkëndija do t’u bashkohet skuadrave si Slloga Jugomagnat, Sileks dhe Makedonija GjP, të cilat janë gëzuar nga tri herë në finalen e madhe.
Për të dyja ekipet kjo do të jetë paraqitja e gjashtë në ndeshjen vendimtare për trofeun.
-
Sileksi për herë të fundit luajti në finale në vitin 2022, kur u mposht nga Makedonija GjP pas ekzekutimit të penalltive, ndërsa vetëm një vit më parë (2021) e fitoi trofeun e fundit duke mposhtur Akademia Pandev, po ashtu pas gjuajtjeve nga pika e bardhë.
-
Shkëndija herën e fundit në finale u paraqit në vitin 2018, kur triumfoi ndaj Pelisterit. Një sezon më parë (2017), tetovarët u mposhtën pikërisht nga bitolasit pas ekzekutimit të penalltive.
Rrugëtimi historik i të dyja skuadrave
Finalen e parë në historinë e klubit Sileksi e ka luajtur në vitin 1994, kur ishte më i suksesshëm se Pelisteri, ndërsa vitin e ardhshëm u mposht në finale nga Vardari. Kupën e dytë në histori kratovasit e fituan në vitin 1997 pas triumfit 4:1 ndaj Slloga Jugomagnatit.
Shkëndija për herë të parë pati shansin të triumfonte në Kupë para dy dekadave. Në paraqitjen e parë në finale, tetovarët u mposhtën me rezultat 3:2 nga Makedonija GjP. Në vitin 2013 pasoi një tjetër pjesëmarrje në finale, por atëherë festoi rivali lokal Teteksi, pas ekzekutimit më të mirë të penalltive. Trofeun e parë nga dy të tillë Shkëndija e fitoi saktësisht para një dekade, duke mposhtur Rabotniçkin me 2:0.
Rruga deri tek finalja e madhe
Të dyja ekipet e nisën rrugëtimin që nga rundi i parë eliminator:
| Skuadra | Rundi i parë | Tetëshja e finales | Çerekfinale | Gjysmëfinale |
| Sileksi | Evrotip (7:1) | Bashkimi (2:1) | Detonit Plaçkovica (3:0) | Ohri (1:1, 1:0) |
| Shkëndija | Jeni Maale (9:0) | Tikveshi (2:0) | Struga Trim Lum (3:2) | Shkëndija Haraçinë (3:2, 2:0) |
Përballjet direkte këtë sezon
Në tri ndeshjet e zhvilluara përgjatë këtë sezoni, Shkëndija ka regjistruar dy fitore: të parën në Tetovë me 2:0, dhe më pas si mysafire në Kratovë me 2:1. Në ballafaqimin e fundit ku Sileksi ishte sërish nikoqir, të dyja skuadrat shënuan nga një gol (1:1).
