TIRANË, 22 Maj 2026 – Aktivistja Evi Kokalari ka publikuar rreth 20 faqe dokumente nga padia e saj e dorëzuar në SPAK kundër Sali Berishës, anëtarëve të familjes së tij dhe disa drejtuesve të lartë të Partisë Demokratike. Sipas Kokalarit, kallëzimi penal bazohet në skemën e mirëfilltë të marrjes peng të strukturave të PD-së që nga Kuvendi i 30 prillit 2022, proces i cili ka shërbyer si bazë për pazare politike dhe përfitime korruptive pasurore me mazhorancën socialiste.
Në dokumentet e dorëzuara në prokurorinë e posaçme, Kokalari lëshon akuza të forta ndaj Flamur Nokës, Belind Këlliçit dhe Albana Vokshit, duke i cilësuar si personat kyç që kontrollojnë partinë nën direktivat e Sali Berishës dhe djalit të tij, Shkëlzenit. Ajo specifikon se Këlliçi dhe Vokshi manipuluan zgjedhjet e Këshillit Kombëtar përmes kuotave të forumeve rinore dhe të gruas, ndërsa Noka instaloi kryetarët e degëve para Kuvendit, duke krijuar një sistem të integruar që shkel nenet 242, 245 dhe 257 të Kodit Penal.
Një pjesë e rëndësishme e padisë lidhet me përdorimin e medias për propagandë në shërbim të familjes Berisha, si dhe me synimin për t’ia kaluar trashëgiminë politike të PD-së Argita Malltezit. Kokalari zbulon detaje nga një bisedë e vitit 2021 ku shprehej qartë vullneti i familjes për zëvendësimin e Sali Berishës nga e bija, pavarësisht mungesës së kontributit të saj direkt në parti, ndërsa shton se i gjithë ky mekanizëm mbrojtës është ngritur për t’i bërë ballë drejtësisë.
Aktivistja gjithashtu ka denoncuar aferat korruptive të së shkuarës, duke marrë si shembull koncesionet e puseve të naftës të aprovuara nga Albana Vokshi për Arjan Tartarin gjatë kohës që ajo ishte pjesë e bordit të Alb-Petrol. Kokalari e mbyll reagimin e saj duke theksuar se kjo skemë korruptive politiko-ekonomike mbron interesat private të klanit Berisha dhe se largimi i tyre është hapi i parë dhe i domosdoshëm për t’u përballur më pas me korrupsionin e ngjashëm brenda Partisë Socialiste.
