Presidenti amerikan Donald Trump ka bërë të ditur se e sheh të arsyeshëm afatin deri të enjten, 27 nëntor, që qeveria e Ukrainës të japë përgjigjen e saj për propozimin më të fundit të paqes për konfliktin në Ukrainë. Duke folur për Fox News Radio, Trump theksoi se afatet mund të zgjaten nëse negociatat avancojnë, por nënvizoi se e enjtja mbetet data e synuar për reagimin zyrtar të Kievit.
Presidenti ukrainas Volodymyr Zelensky u informua një ditë më parë për draft-planin dhe reagimi i tij publik ndezi debat të ri politik. Ai deklaroi se dokumenti e vendos Ukrainën para një dileme të vështirë, duke e përshkruar situatën si “një zgjedhje mes humbjes së dinjitetit dhe rrezikut për të humbur një partner kyç”, duke aluduar për Shtetet e Bashkuara.
Zelensky theksoi se Ukraina do të intensifikojë komunikimin me Uashingtonin për të analizuar të gjitha opsionet e mundshme dhe për të identifikuar alternativa që nuk e cënojnë interesin kombëtar të vendit.
