Sot ishte afati i fundit për pagesën e mjeteve nga “TVSH-ja Ime”, por një numër i madh i qytetarëve të vendit ende nuk i kanë marrë mjetet e tyre. Kjo po ndodh për herë të parë që nga futja e kësaj mase, e cila është një nga të paktat që kthen drejtpërdrejt para tek qytetarët.
Qytetarët ende e presin rimbursimin e rregullt për tremujorin e tretë (korrik, gusht, shtator) përmes aplikacionit “TVSH-ja Ime”. Kjo është një nga masat e rralla që kthen mjete direkt te përdoruesit, por këtë herë pagesa po vonon dhe nuk ka informacione të sakta se kur do të realizohet.
Shumë prej tyre thonë se deri më tani gjithmonë e kanë marrë rimbursimin me kohë dhe nuk kanë pasur asnjë problem as me aplikacionin, as me llogaritë transaksionale. Për një pjesë të qytetarëve, këto 1.500–2.100 denarë janë ndihmë e rëndësishme për mbulimin e shpenzimeve mujore.
Një qytetare tregon se paratë i ruan për fëmijët e saj, sepse në kushte të të ardhurave të ulëta çdo denar ka rëndësi. Pensionistët thonë se rimbursimi i ndihmon të paguajnë shpenzimet bazë, ndërsa studentët vlerësojnë se, edhe pse shumat nuk janë të mëdha, është shumë e rëndësishme që pagesat të realizohen me rregull.
Sipas dispozitave ligjore, pagesa duhet të kryhet brenda 60 ditëve pas përfundimit të tremujorit – që do të thotë se për tremujorin e tretë afati është deri më 30 nëntor 2025.
Në një tremujor, çdo përdorues mund të marrë deri në 2.100 denarë rimbursim, ndërsa një familje me katër anëtarë – deri në 8.400 denarë, nëse i skanon rregullisht faturat. Për produktet maqedonase rimbursimi është 20% e TVSH-së, ndërsa për produktet e importuara – 10%.
Drejtoria e të Hyrave Publike më herët informoi se pagesa për tremujorin e dytë (prill–qershor 2025) ishte realizuar me sukses, me gjithsej 881 milionë denarë të paguar për më shumë se gjysmë milioni përdorues.
