Ministrja shqiptare thekson rëndësinë e shtetit të Kosovës dhe mbështetjen e Shqipërisë për Ukrainën
Vjenë, 4 dhjetor 2025 – Ministrja për Evropën dhe Punët e Jashtme e Shqipërisë, Elisa Spiropali, ka theksuar rëndësinë e njohjes së Kosovës si shtet i pavarur dhe sovran, duke e cilësuar këtë si një hap thelbësor për sigurinë dhe zhvillimin e qëndrueshëm në Ballkan.
Deklarata u bë gjatë pjesëmarrjes së saj në punimet e 32-të të Ministerialit të OSBE-së, që po zhvillohet në Vjenë, Austri. Spiropali lidh stabilitetin e Evropës Juglindore direkt me realitetin e pakthyeshëm të shtetit të Kosovës, duke vënë theksin te sfidat e sigurisë globale dhe rajonale.
Përveç çështjeve rajonale, ministrja rikonfirmoi qëndrimin e palëkundur të Shqipërisë në mbështetje të Ukrainës dhe Perëndimit, duke dënuar agresionin rus dhe duke theksuar angazhimin për respektimin e ligjit ndërkombëtar dhe mbrojtjen e dinjitetit njerëzor.
Në një reagim në rrjetet sociale pas takimeve, Spiropali shkroi:
“Rikonfirmova mbështetjen e plotë të Shqipërisë për ligjin ndërkombëtar, drejtësinë dhe dinjitetin njerëzor përballë agresionit rus në Ukrainë. Paqja, stabiliteti dhe siguria në Evropë mbeten prioritetet tona kryesore.”
