Një fshat francez mori 10 milionë euro nga një njeri që nuk ka jetuar kurrë atje

Një fshat francez (me një popullsi prej 1.773 banorë) mori një trashëgimi prej 10 milionë eurosh nga Roger Tiberville, një njeri që as ka jetuar në fshat, as e ka vizituar atë. Ai vinte nga një familje pronarësh vreshtash, kishte trashëguar një pasuri në Paris nga prindërit e tij dhe ka punuar si meteorolog.

Roger Tiberville në fakt kishte të njëjtin mbiemër me emrin e fshatit, i cili quhet Tiberville. Ai vdiq në gusht 2024 në moshën 91-vjeçare, por nuk la pasardhës, kështu që vendosi t’ia dhurojë pasurinë e tij fshatit. Pas vdekjes së Roger, kryetari i fshatit Tiberville mori një telefonatë, ku u njoftua për dhuratën – pothuajse 10 milionë euro. Për shkak se fshati është një organ publik, ai nuk do të duhet të paguajë taksën e trashëgimisë.

Gai Paris, kryetari i fshatit, deklaroi se banorët dhe funksionarët lokalë të habitur dhe të gëzuar tani po mendojnë se si ta shpenzojnë këtë trashëgimi të papritur, që është pesë herë më e madhe se buxheti vjetor i bashkisë. “Kjo është një shumë e jashtëzakonshme parash. Është e qartë që shuma është si nga ëndrrat,” tha Paris për stacionin lokal të radios France Bleu.

“Ne nuk do t’i shpenzojmë të gjithë paratë. Do ta menaxhojmë këtë trashëgimi ashtu siç kemi menaxhuar gjithmonë buxhetin tonë të bashkisë – me kujdes dhe përgjegjshmëri.”

Bashkia franceze tani po planifikon të paguajë kredinë bankare prej më shumë se 400.000 eurosh që u përdor për ndërtimin e një shkolle të re fillore.