Ish-ministri i Jashtëm, Edmond Panariti, komentoi vizitën e ministres së Jashtme në Athinë dhe zhvillimet në marrëdhëniet shqiptaro-greke, me fokus çështjen e kufirit detar. Ai e vlerësoi rikthimin e dialogut pas dy vitesh tensione si një hap pozitiv, por nënvizoi se negociatat duhet të sjellin rezultate konkrete, jo vetëm deklarata.
Sa i përket çështjes së detit, Panariti paralajmëroi se dërgimi i saj në Gjykatën Ndërkombëtare të Drejtësisë në Hagë mund të jetë i rrezikshëm për Shqipërinë, pasi vendimet e gjykatës janë përfundimtare dhe pa të drejtë apelimi.
Ai rikujtoi marrëveshjen e vitit 2018, e cila parashikonte rikthimin e rreth 40 km² hapësirë detare në favor të Shqipërisë, por që nuk u ratifikua nga pala greke. Panariti sugjeroi një qasje të segmentuar: çështjet pa mundësi kompromisi të dërgohen në arbitrazh, ndërsa zonat e peshkimit dhe burimet energjetike të zgjidhen përmes negociatave bilaterale.
