TIRANË – Klodian Braho, drejtuesi i sapozgjedhur i Prokurorisë së Posaçme (SPAK), ka dhënë intervistën e tij të parë duke shpallur një linjë të ashpër kundër pandëshkueshmërisë. Në një moment kur politika vlon nga hetimet e nivelit të lartë, Braho ka garantuar se misioni i tij mbetet barazia para ligjit.
Braho, i cili pason Altin Dumanin në këtë detyrë sfiduese, u shpreh për BIRN se fokusi i tij nuk do të jetë vetëm hetimi penal, por edhe goditja e pasurive të paligjshme përmes konfiskimeve.
“Prioriteti im është të garantoj shqiptarët se askush nuk është mbi ligjin. Do të përqendrohemi në çështjet aktuale dhe do të vijojmë hetimet e thelluara,” deklaroi 43-vjeçari Braho.
Dosjet “e nxehta” në tryezë Mandati i Brahos nis me dosje voluminoze që prekin majat e pushtetit:
-
Belinda Balluku: SPAK pret heqjen e imunitetit për zv/kryeministren në janar.
-
Skandali në AKSHI: Hetimet për manipulimin e tenderëve në sistemin digjital.
-
Dosjet e vjetra: Çështjet ndaj Sali Berishës, Ilir Metës dhe Erion Veliajt mbeten në qendër të vëmendjes.
Ish-kreu i SPAK, Altin Dumani, shprehu besimin e tij se Braho do të ruajë standardet e larta të vendosura deri më tani, ndërsa gazetarët e kronikës e shohin Brahon si një prokuror karriere që njeh mirë “makinerinë” e hetimeve të ndërlikuara.
