Kandidati i koalicionit VLEN për komunën e Gostivarit, Nevzat Bejta, ka shpërthyer në kritika ndaj kundërkandidatit të tij nga AKI, Valbon Limani, duke e cilësuar atë si një figurë pa autonomi politike. Gjatë një paraqitjeje në emisionin “Debat në SHENJA”, Bejta u shpreh i bindur për një fitore të madhe në zgjedhjet e 11 janarit.
“Limani, nën hijen e mentorit të tij” Bejta hodhi akuza se Valbon Limani nuk është i gatshëm të udhëheqë Gostivarin, pasi sipas tij, ai kontrollohet plotësisht nga Arben Taravari.
“Ky djalë nuk është për kryetar. Ai nuk guxon të debatojë drejtpërdrejt me mua sepse mentori i tij nuk e lejon. Mësuesin e ka shumë të keq dhe bashkë kanë bërë krim ndaj qytetarit të Gostivarit,” deklaroi Bejta.
Përgjigjja ndaj akuzave për pasurinë I pyetur për akuzat e fundit lidhur me një vilë luksoze në fshatin Duf, që thuhet se vlen 1 milion euro, Bejta i hodhi poshtë ato si të pabaza. Ai sqaroi se e gjithë pasuria e tij është e deklaruar zyrtarisht në listat anketuese dhe është e njohur për institucionet shtetërore.
Betimi për 11 janarin Sipas Bejtës, dita e zgjedhjeve do të jetë një “moment tronditjeje” për udhëheqjen aktuale.
-
Dallimi sipas Bejtës: “Valbon Limani punon për ta shpëtuar Taravarin, ndërsa unë punoj për ta ndërtuar Gostivarin.”
Ai përfundoi duke thënë se demokracia kërkon ballafaqim idesh, diçka që sipas tij po mungon nga pala tjetër për shkak të varësisë politike.
