Kapiteni i FC Shkupit, Suhejl Muharrem, ka njoftuar zyrtarisht mbylljen e rrugëtimit të tij me ngjyrat bardhekaltër. Përmes një mesazhi emocional, Muharrem ka përshëndetur tifozët, stafin dhe bashkëlojtarët, duke lënë pas një histori sakrifice dhe përkushtimi.
Muharrem, i cili u bë simbol i qëndresës së klubit nga Çairi, theksoi se ndihet krenar që ishte pjesë e skuadrës në periudhat më sfiduese. Ai nënvizoi se kontributi i tij tejkalon statistikat, duke u fokusuar te ndihma që dha për ta mbajtur klubin në nivele të larta.
“Erdha për të ndihmuar” Në mesazhin e tij të lamtumirës, kapiteni u shpreh:
“Jam shumë krenar që isha pjesë e kohës më të vështirë në klub. Do të mbahem mend jo vetëm për gola dhe rekorde, por për faktin që erdha atëherë kur klubi kishte më së shumti nevojë për ndihmë.”
Një derë e hapur për rikthim Ndonëse po largohet nga trupa aktive e skuadrës, Muharrem ka lënë të kuptohet se lidhja e tij me FC Shkupin është e përjetshme. Ai e mbylli mesazhin e tij duke thënë se ky nuk është një fund, por vetëm një ndarje e përkohshme me shpresën për t’u rikthyer në të ardhmen për të festuar tituj të tjerë.
Suhejl Muharrem mbetet një nga figurat më të respektuara të viteve të fundit në Çair, duke u vlerësuar lart nga tifo-grupi “Shvercerat” dhe i gjithë opinioni sportiv për etikën e tij të punës dhe lidershipin në fushë.
