TETOVË – Një vendim i Gjykatës Kushtetuese të Maqedonisë së Veriut ka rikthyer debatin mbi emërtimet e rrugëve dhe shesheve në qytetin e Tetovës, duke shfuqizuar vendimin e vitit 2007 që mundësoi emërtimet shqipe dhe të figurave historike kombëtare.
Gjykata ka vendosur të shfuqizojë vendimin e mëparshëm të Këshillit të Komunës së Tetovës, me arsyetimin se ndryshimet e vitit 2007 janë bërë pa pëlqimin e Qeverisë, në kundërshtim me ligjin e vitit 2004. Ky vendim u miratua me 5 vota “pro”, ndërsa gjyqtarët shqiptarë dhe ai turk votuan “kundër”.
Si pasojë e këtij vendimi, emra si “Iliria”, “Dëshmorët e Kombit”, “Dervish Cara” dhe “Kongresi i Manastirit” pritet të zëvendësohen nga emërtimet e periudhës komuniste, si “Marshall Tito”, “JNA” apo “29 Nëntori”.
Reagimi i ashpër i Adnan Azizit
Deputeti Adnan Azizi ka reaguar menjëherë pas këtij vendimi, duke akuzuar Gjykatën Kushtetuese dhe partitë në pushtet për një fushatë të vazhdueshme kundër figurave dhe vlerave shqiptare.
Në një mesazh të qartë dhe sfidues, Azizi theksoi se asnjë vendim gjyqësor nuk mund ta ndalë procesin e emërtimit të rrugëve me emra shqip në Tetovë, duke e cilësuar këtë si një përpjekje për të goditur kryetarin Bilall Kasami.
Për të ilustruar absurditetin e kësaj situate, Azizi nxori në pah realitetin që qytetarët e Tetovës përballen prej vitesh në dokumentet zyrtare:
“P.S. Ja si e ka ‘zgjidhur’ BDI-ja çështjen e emrave në Tetovë: ‘Dervish Cara’ në dokumente për 20 vjet ka figuruar si ‘JNA’!”, shkroi Azizi në reagimin e tij.
Ai e mbylli deklaratën me një zotim për vazhdimësinë e procesit, duke nënvizuar se: “Rrugët në Tetovë do të kenë emra shqip. As Gjykata e BDI-SDSM, as askush tjetër nuk mund ta ndalë këtë proces.”
Reagime të tjera
Edhe Sekretari i Përgjithshëm i BDI-së, Arbër Ademi, ka reaguar ashpër, duke e cilësuar Gjykatën si “destabilizuese” dhe duke akuzuar pushtetin aktual se po kthen vendin mbrapa në kohë, duke u rikthyer emrave të periudhës jugosllave për shkak të përfitimeve të ngushta politike.
Nisma për shfuqizimin e emrave u dorëzua nga “Lidhja e Luftëtarëve të LNÇ-së së Tetovës” në fillim të vitit 2025, me pretendimin se emërtimet duhet të jenë vetëm në gjuhën maqedonase.
