Një turiste nga Australia ka nxitur debate të shumta në rrjetet sociale pas publikimit të një videoje në TikTok, në të cilën ankohet për çmimet e larta të produkteve ushqimore në Kroaci. Në videon e filmuar brenda një dyqani, ajo shpreh habinë se si mund të mbijetojnë njerëzit atje, duke theksuar se çmimi i qumështit është tre euro, ndërsa një shampo kushton mbi tetë euro.
Videoja, e cila ka grumbulluar më shumë se 400,000 shikime, ka shkaktuar reagime të ndryshme nga banorët vendas:
-
Disa komentues kanë sqaruar se qumështi në përgjithësi kushton një euro, por çmimet janë më të larta në zonat turistike dhe në ishuj.
-
Një pjesë e vendasve kanë kritikuar turisten se ka zgjedhur një dyqan të gabuar dhe të shtrenjtë.
-
Pati edhe reagime të ashpra, ku disa i kanë porositur turistes të mos vijë në Kroaci nëse nuk mund t’ia lejojë vetes shpenzimet.
-
Disa kroatë janë solidarizuar me ankesën e saj, duke u shprehur se edhe ata vetë e kanë të vështirë të përballojnë çmimet e larta dhe se jeta në vend është bërë një “mbijetesë”.
-
Një pjesë e komentuesve kanë theksuar se këto çmime janë të destinuara për turistët, që bizneset të sigurojnë të ardhura për gjithë vitin gjatë sezonit veror.
Kjo nuk është hera e parë që çmimet në Kroaci ngjallin debat, pasi edhe më herët janë raportuar ankesa të ngjashme nga turistë të ndryshëm, përfshirë ato për çmimet e shezlongëve në Makarska.
