Në Gjermani është hapur një debat i gjerë mbi rritjen e moshës së daljes në pension, duke e çuar atë në 70 vjeç. Arsyeja kryesore lidhet me rritjen e jetëgjatësisë, shkallën e ulët të lindjeve dhe mungesën e fuqisë punëtore.
Komiteti i Pensioneve i Qeverisë gjermane pritet të shqyrtojë më 23 shkurt propozimet për reformën e sistemit, ndërsa ekonomistët paralajmërojnë se ky hap është i domosdoshëm për të ruajtur qëndrueshmërinë financiare.
- Holger Schaefer nga Instituti Ekonomik Gjerman (IW) thotë se vendimi vjen vonë, pasi dalja në pension e brezit “Boomer” ka krijuar boshllëqe të mëdha në tregun e punës.
- Dominik Groll nga Instituti Kiel për Ekonominë Botërore (IfW) propozon që mosha e pensionit të lidhet drejtpërdrejt me jetëgjatësinë, duke theksuar se pagesat e pensioneve tashmë zgjasin dyfish më shumë se 50 vite më parë.
Ekonomistët bien dakord në tri pika:
- Po jetojmë më gjatë, prandaj duhet të punojmë më gjatë.
- Sistemi i pensioneve duhet të lidhet me rritjen e jetëgjatësisë.
- Punëtorëve duhet t’u jepen stimuj për të punuar edhe pas moshës së pensionit.
Qeveria gjermane i ka dhënë Komitetit të Pensioneve afat deri më 30 qershor për të paraqitur propozime konkrete. Reforma shihet si një nga sfidat më të mëdha për koalicionin në Berlin.
