TUZ – Komuna e Tuzit ka bërë një hap tjetër të rëndësishëm drejt modernizimit të infrastrukturës lokale. Kryetari i Komunës, z. Lindon Gjelaj, ka njoftuar hapjen e procedurës së prokurimit publik për ndërtimin e Urës në vendbanimin Dinoshë, një projekt që kap vlerën prej 900.676,25 euro.
Ky investim konsiderohet jetik për përmirësimin e qarkullimit dhe ndërlidhjen më të mirë brenda kësaj bashkësie lokale. Sipas Gjelajt, ky projekt është pjesë e ciklit të investimeve madhore që po realizohen në Malësi.
Infrastruktura në fokus
Përveç projektit të urës, Kryetari Gjelaj dha detaje edhe për ecurinë e punimeve në akse të tjera rrugore:
-
Rruga Tuz–Hakaj–Rranxë Qafë: Ndodhet tashmë në fazën përfundimtare të punimeve.
-
Rruga Tuz–Mataguzh: Procedura e prokurimit pritet të përmbyllet brenda pak ditësh, duke i hapur rrugë nisjes së punimeve.
“Kështu po realizohen premtimet dhe projektet zhvillimore të Forumit Shqiptar. Së bashku po ndryshojmë Malësinë!” – deklaroi z. Gjelaj.
Ky investim i ri konfirmon fokusin e administratës lokale në përmirësimin e jetës së qytetarëve përmes projekteve konkrete që prekin drejtpërdrejt infrastrukturën rrugore dhe zhvillimin ekonomik të zonës.
