UASHINGTON – Në një seancë të rëndësishme të Komisionit për Punë të Jashtme të Dhomës së Përfaqësuesve të SHBA-së, Kongresistit Keith Self, në cilësinë e Kryetarit të Nënkomitetit për Evropën, ka dhënë mesazhe të forta në mbështetje të shtetësisë dhe integrimit euro-atlantik të Kosovës.
Gjatë fjalës së tij, Self e cilësoi Kosovën si “një nga partnerët më të afërt dhe më besnikë të Shteteve të Bashkuara në Evropë”. Ai shprehu shqetësimin se refuzimi i disa shteteve anëtare të NATO-s për ta njohur pavarësinë e Kosovës po minon stabilitetin afatgjatë në Ballkan, duke lënë hapësirë për rritjen e ndikimit të aktorëve keqdashës, përfshirë Rusinë.
Duke iu referuar përvojës së tij personale në planifikimin e ndërhyrjes së NATO-s në vitin 1999, Kongresisti Self theksoi se Kosova ka dëshmuar një përkushtim të palëkundur ndaj vlerave demokratike, sigurisë rajonale dhe bashkëjetesës multietnike. Sipas tij, këto arritje e bëjnë Kosovën një kandidat të natyrshëm dhe të domosdoshëm për anëtarësim në NATO.
Në një tjetër moment të seancës, gjatë nderimit të figurës së Eliot Engel, Self e përshkroi ish-kongresistin si një “hero në Kosovë”, duke theksuar se Engel e kuptonte rolin e Kosovës si gurthemeli i stabilitetit në Ballkanin Perëndimor. Ai kritikoi kontradiktën e politikës aktuale, ku ndërsa vlerësohen aleatët e Kosovës në Uashington, dështohet të ofrohet mbështetje e plotë për rrugëtimin e saj drejt integrimit euro-atlantik.
Këto deklarata konsiderohen ndër më të qartat dhe më të fuqishmet të dëgjuara së fundmi në Kongresin Amerikan në mbështetje të sovranitetit të Kosovës dhe rëndësisë së saj strategjike për paqen në rajon.
Komuniteti shqiptaro-amerikan inkurajohet që të vazhdojë angazhimin e tij, duke kontaktuar përfaqësuesit e tyre në Kongres për të kërkuar mbështetjen e këtyre masave vendimtare.
Mund t’i ndiqni deklaratat e plota të Kongresistit Keith Self në videot më poshtë:
