“Të shëndoshë dhe të lumtur” është shprehja që përdoret shpesh me shaka për çiftet që shtojnë peshë në vitin e parë të lidhjes. Megjithatë, kur “periudha e mjaltit” kalon, ky ndryshim shpesh kthehet në një problem që ndikon në vetëbesimin dhe mirëqenien e partnerëve.
Sipas një studimi të Universitetit Qendror të Queensland në Australi, ku u anketuan 15,000 persona, rezultoi se njerëzit në një lidhje të lumtur shtojnë mesatarisht 5.8 kilogramë më shumë krahasuar me ata që janë beqarë.
Pse ndodh ky fenomen?
Shtimi në peshë në vitin e parë të një lidhjeje ose martese është kryesisht rezultat i relaksimit:
Rënia e “presionit” për të qenë në formë: Çiftet shpesh ndihen më të sigurt se partneri do t’i dojë pavarësisht pamjes, ndaj ulen kriteret për t’u kujdesur për fizikun.
Më pak aktivitet fizik: Studimi tregon se çiftet stërviten shumë më pak se beqarët. Dëshira për të qëndruar në shtëpi dhe për të kaluar kohë së bashku mbizotëron mbi aktivitetet fizike.
Gatimi dhe darkat romantike: Gatimi së bashku është kthyer në një aktivitet kryesor për çiftet. Darkat romantike, shoqëruar me verë dhe ushqime të bollshme, ose pjesëmarrja në festa ku konsumohet shumë ushqim, ndikojnë drejtpërdrejt në shtimin e peshës.
Ndikimi në lidhje dhe si ta mbani formën
Pakënaqësia me pamjen fizike nuk ndikon vetëm personalisht, por mund të reflektohet edhe në cilësinë e lidhjes. Pasiguria, nervozizmi dhe ndryshimi i humorit mund të krijojnë tension mes partnerëve.
Si ta menaxhoni situatën?
Kontrolloni ushqimin: Fokusohuni te një dietë e shëndetshme, pa e bërë ushqimin qendrën e takimeve tuaja.
Aktivitet fizik në çift: Në vend që të rrini vetëm në shtëpi, gjeni një aktivitet fizik që mund ta bëni së bashku. Kjo jo vetëm që do t’ju ndihmojë të ruani linjat, por do t’ju bëjë edhe më të përkushtuar ndaj njëri-tjetrit.
Hidratimi: Pini shumë ujë dhe përpiquni të mbani një stil jetese aktiv.
Të qenit i lumtur dhe i dashuruar nuk duhet të jetë justifikim për t’u lënë pas dore. Përkundrazi, kujdesi për veten dhe shëndetin do ta bëjë lidhjen tuaj edhe më të qëndrueshme dhe më të bukur.
