Uashington – Liderët republikanë në Dhomën e Përfaqësuesve të Kongresit Amerikan kanë anuluar papritur votimin për një rezolutë që kërkonte përfundimin e luftës me Iranin, nëse presidenti Donald Trump nuk merr miratimin zyrtar të Kongresit. Ky vendim vjen vetëm dy ditë pasi një masë e ngjashme kaloi me sukses në Senat. Pas anulimit, demokratët njoftuan se kishin siguruar tashmë shumicën e nevojshme për miratimin e rezolutës, pavarësisht faktit se Dhoma e Përfaqësuesve kontrollohet nga republikanët, të cilët më herët kishin bllokuar tre iniciativa të ngjashme falë unitetit partiak.
Ndryshimi i humorit politik në Uashington vjen pas sulmeve të nisura nga SHBA-ja dhe Izraeli kundër Iranit më 28 shkurt, të cilat nuk kanë dhënë rezultatet e pritura, duke bërë që disa republikanë të rreshtohen kundër linjës së presidentit. Ndërsa demokratët dhe një pjesë e republikanëve insistojnë se sipas Kushtetutës vetëm Kongresi ka të drejtën të shpallë luftë, Shtëpia e Bardhë dhe shumica e konservatorëve mbrojnë qëndrimin se veprimet e Trumpit janë të ligjshme dhe brenda kompetencave të tij si komandant suprem për të mbrojtur vendin nga kërcënimet e menjëhershme.
