Seanca e shqyrtimit gjyqësor ndaj të akuzuarve Naim Murseli, Granit Plava dhe Kushtrim Kokalla, e planifikuar për sot, më 12 dhjetor 2025, në orën 09:30, është anuluar.
Gjykata ka njoftuar se arsyeja e shtyrjes është pamundësia e pjesëmarrjes së gjyqtarit Alban Ajvazi, një nga anëtarët e trupit gjykues. Data e re e seancës është caktuar për 22 dhjetor 2025, po në orën 09:30.
Të tre të akuzuarit po gjykohen për vrasje të rëndë në rastin e vrasjes së Liridona Ademajt. Sipas raportit të Institutit të Psikiatrisë Forenzike të Kosovës, Naim Murseli nuk ka pasur çrregullime ose sëmundje mendore në kohën e kryerjes së veprës penale.
Në seancën fillestare, më 31 janar 2025, Naim Murseli u deklarua i pafajshëm, Granit Plava nuk dha deklaratë për fajësinë, ndërsa Kushtrim Kokalla preferoi të mos deklarohej pa u konsultuar me mbrojtjen. Ndërsa, i akuzuari Tom Dodaj pranoi fajësinë dhe u dënua me 5 vjet burgim dhe 5,000 euro gjobë.
Prokuroria Themelore në Prishtinë kishte ngritur aktakuzë më 15 janar 2025 ndaj Naim Murselit, Granit Plavës, Kushtrim Kokallës dhe Tom Dodajt.
