Durrës, Shqipëri – Komuna e Tetovës mori pjesë në konferencën ndërkombëtare “Aleanca e Kryetarëve të Gjelbër”, e cila u zhvillua në Durrës, duke shënuar një hap të rëndësishëm drejt zhvillimit të qëndrueshëm dhe komunave ekologjike në rajon.
Delegacionin e Tetovës e udhëhoqi zëvendëskryetari i komunës, Albi Qamili, i shoqëruar nga kreu i sektorit për Zhvillim Ekonomik Lokal, Elmi Osmani, dhe shefi i kabinetit të kryetarit, Basri Mehmedalija.
Punëtori teknike dhe strategji e përbashkët
Në sesionin e parë të konferencës u zhvillua Punëtoria Teknike e Aleancës, ku përfaqësuesit e komunave anëtare identifikuan fushat prioritare të bashkëpunimit dhe sfidat që duhen kapërcyer kolektivisht. Qëllimi kryesor ishte hartimi i një strategjie të përbashkët për transformimin e komunave në njësi ekologjikisht të qëndrueshme.
Financimi dhe inovacioni dixhital në qendër të diskutimeve
Një vëmendje e veçantë iu kushtua mundësive të financimit në dispozicion për komunat anëtare, si dhe mënyrës së përgatitjes së propozimeve cilësore për projekte. Si zgjidhje inovative u prezantua Balkan AI Tool – një platformë dixhitale e krijuar posaçërisht për të mbështetur procesin e gjelbërimit të komunave në rajonin e Ballkanit.
Qeverisja transparente dhe llogaridhënëse
Diskutimet u fokusuan gjithashtu në modelin e qeverisjes për Aleancën, duke theksuar mekanizmat e koordinimit, përcaktimin e qartë të roleve dhe strukturat e komunikimit ndërkomunal. Parimet themelore të këtij modeli mbeten transparenca, pjesëmarrja qytetare, llogaridhënia dhe pronësia komunale.
Tetova – e gatshme për të ardhmen e gjelbër
Komuna e Tetovës tashmë është zyrtarisht pjesë e këtij rrjeti rajonal dhe, sipas zyrtarëve, është në fazë të avancuar me projekte konkrete që synojnë mbrojtjen e mjedisit jetësor. Zyrtarët komunalë shprehen optimistë se Tetova së shpejti do të renditet ndër komunat model të gjelbra në rajon.
Komuna e Tetovës vazhdon angazhimin e saj aktiv në iniciativat rajonale dhe ndërkombëtare për zhvillim të qëndrueshëm dhe mbrojtje të mjedisit.
