Palermo, 07 Mars 2026
Pas katër ditësh lufte të dëshpëruar me vdekjen, zemra e Tili Pilincit, 39 vjeç, ka pushuar së rrahuri në njësinë e kujdesit intensiv të spitalit “Villa Sofia” në Palermo. Ky lajm i trishtë rëndon edhe më shumë bilancin e aksidentit tragjik të së hënës së kaluar (3 mars) në autostradën Naro-Camastra, duke e çuar numrin e viktimave shqiptare në dy.
Katër ditë agoni pas përplasjes fatale
Tili Pilinci ishte shoferi i mjetit që transportonte punëtorët shqiptarë drejt arave të Siçilisë, kur u përplas fuqishëm me një kamion të ngarkuar me fruta-perime.
-
Gjendja kritike: Që nga momenti i aksidentit, mjekët e kishin cilësuar gjendjen e tij si tejet të rëndë. Ai u transferua me urgjencë nga Canicattì drejt Palermos, por lëndimet ishin shumë të rënda për t’u mbijetuar.
-
Viktima e parë: Në vendngjarje, menjëherë pas përplasjes, humbi jetën i riu Flori Topalli, vetëm 24 vjeç.
Ëndrra e thyer e punëtorëve sezonalë
Tragedia bëhet edhe më prekëse kur mësohet se grupi i shqiptarëve (të moshave 24 deri në 39 vjeç) kishin mbërritur vetëm së fundmi në Itali. Ata ishin vendosur në zonën e Canicattì dhe Naros për t’u angazhuar në punë sezonale bujqësore, me shpresën për të ndërtuar një të ardhme më të mirë.
“Ishin duke shkuar në punë, ende pa lindur dielli, kur ëndrrat e tyre u prenë në mes në atë kthesë të mallkuar,” raportojnë mediat lokale italiane.
Gjashtë të plagosur nën monitorim
Përveç dy viktimave, nga ky aksident mbetën të plagosur edhe gjashtë persona të tjerë, të cilët po marrin trajtim mjekësor, por fatmirësisht jashtë rrezikut për jetën. Autoritetet italiane po vijojnë hetimet për të zbardhur shkaqet e plota të përplasjes, ku dyshohet se shikueshmëria e ulët para agimit mund të ketë qenë një faktor përcaktues.
/ KOHANEWS
