STOKHOLM – Qeveria suedeze ka prezantuar këtë të hënë një paketë të re masash që synojnë të ashpërsojnë ndjeshëm kriteret për të gjithë personat që kërkojnë të pajisen me pasaportë suedeze. Kabineti i qendrës së djathtë, i mbështetur nga “Demokratët e Suedisë”, kërkon të kalojë nga kushtet “minimale” në një sistem shumë më kërkues.
Nëse jeni duke menduar të aplikoni për shtetësinë suedeze, këto janë ndryshimet kryesore që duhet të keni parasysh:
Kushtet e reja sipas propozimit:
-
Kohëzgjatja e qëndrimit: Periudha e kërkuar e qëndrimit në vend rritet nga 5 në 8 vite.
-
Kriteri ekonomik: Aplikantët duhet të dëshmojnë të ardhura mujore prej të paktën 20,000 korona suedeze (rreth 1,750 euro).
-
Njohja e gjuhës dhe kulturës: Do të jetë i detyrueshëm kalimi me sukses i një testi për gjuhën suedeze dhe njohuritë mbi shoqërinë suedeze.
-
Precedentët penalë: Rregullat ashpërsohen për ata që kanë kryer vepra penale. Për shembull, një person që ka kryer 4 vite burg, do të duhet të presë 15 vite pas lirimit përpara se të ketë të drejtë aplikimi.
Ministri i Migracionit, Johan Forssell, u shpreh se këto reforma janë të nevojshme për të garantuar sigurinë dhe për të luftuar krimin e organizuar, duke u distancuar nga politikat e liberalizuara të së kaluarës.
Kur hyjnë në fuqi? Nëse propozimi miratohet në parlament, rregullat e reja pritet të bëhen efektive më 6 qershor 2026.
