BOGOVINË, 10 Shkurt 2026 – Vetëm një muaj pas pastrimit të deponive të egra përgjatë rrugës malore Bogovinë-Novosellë, persona të papërgjegjshëm kanë hedhur sërish mbeturina inerte dhe plastike, duke dëmtuar mjedisin dhe investimin e komunës.
Lajmi u bë i ditur nga Kryetari i Komunës së Bogovinës, Feti Abazi, i cili përmes një reagimi zyrtar shprehu shqetësimin për papërgjegjshmërinë e disa individëve dhe kompanive.
Ndërhyrje e re për pastrimin e rrugës
Sot, Ndërmarrja Komunale “Sharri” u detyrua të ndërhyjë sërish me makineri për të pastruar aksin rrugor nga inertet, qeset dhe plastika që ishin hedhur gjatë ditëve të fundit. Abazi bëri të ditur se pavarësisht përpjekjeve për të mbajtur ambientin pastër, neglizhenca e qytetarëve po krijon kosto dhe dëme të panevojshme.
Paralajmërim për gjoba dhe masa ligjore
Kryetari Abazi ka lëshuar një paralajmërim të prerë për të gjithë ata që shkelin rregullat e mbrojtjes së mjedisit:
“Ju bëj APEL qytetarëve që të tregojnë kujdes për mirëmbajtjen e mjedisit! Paralajmëroj kompanitë dhe individët që hedhin inerte në mënyrë joligjore se Komuna do të veprojë në përputhje me ligjin për çdokënd që shkel rregullat dhe ligjin për mbrojtjen e mjedisit”, deklaroi Abazi.
Mesazhi i komunës mbetet i qartë: Të mbrojmë ambientin dhe natyrën bashkë! Institucionet lokale bëjnë thirrje që qytetarët t’i denoncojnë rastet e hedhjes së mbeturinave në vende të ndaluara për të parandaluar krijimin e deponive të reja.
