06 mars 2026 | 00:36
Një aksident rrugor i frikshëm është regjistruar mesditën e së enjtes në aksin Morinë–Kukës, pranë fshatit Përbreg. Një automjet me targa të Kosovës ka dalë nga rruga, është përplasur me murin mbajtës të autostradës dhe më pas ka rënë nga një lartësi prej rreth 10 metrash.
Detajet e aksidentit
Drejtuesi i mjetit, Besart Cecelia, 48 vjeç, i cili udhëtonte i vetëm, ka arritur të dalë nga makina pa pasoja shëndetësore, duke u konsideruar ky një shpëtim i mrekullueshëm. Cecelia, me origjinë nga Vushtrria, është trajneri i ekipit të futbollit FC Basanja, që garon në Kategorinë e Dytë në Shqipëri.
Dëshmia e trajnerit: “Më zuri gjumi në timon”
Vetë Cecelia ka rrëfyer momentet kritike, duke pranuar se shkaku i aksidentit ishte lodhja e tepërt gjatë rrugëtimit nga Kosova drejt Shkodrës, ku e priste stërvitja me ekipin.
“Quhem Besart Cecelia, jam nga Vushtrria. Isha duke ardhur nga Kosova për të shkuar në punë. Isha i lodhur dhe në një moment më zuri gjumi. E pashë veten duke dalë nga rruga. Falë Zotit shpëtova dhe jam shumë mirë. Mendoj se lartësia nga e cila rashë ishte më shumë se 10 metra,” u shpreh ai.
Trajneri shtoi se pas kësaj rënieje dramatike ndihet sikur “ka lindur për së dyti”, pasi makina ka pësuar dëmtime të rënda, por ai vetë nuk ka pësuar asnjë lëndim serioz.
Rreziku nga lodhja në timon
Ky rast risjell në vëmendje rrezikun e madh që paraqet drejtimi i mjetit në gjendje lodhjeje, sidomos në akse të shpejta si Rruga e Kombit. Ekspertët rrugorë bëjnë thirrje vazhdimisht për pushime periodike gjatë udhëtimeve të gjata për të shmangur të ashtuquajturin “mikro-gjumë”.
Fatmirësisht, ky aksident u mbyll vetëm me dëme materiale, ndërsa trajneri Cecelia pritet t’i rikthehet detyrës së tij pranë FC Basanja pas marrjes së veten nga tronditja.
