PRISHTINË, 20 mars 2026 – Besimtarët myslimanë në Kosovë dhe mbarë botën kremtojnë sot Fitër Bajramin, festën që kuron përmbylljen e muajit të shenjtë të Ramazanit. Pas një muaji përkushtimi, sakrifice dhe solidariteti, kjo ditë vjen si një moment gëzimi dhe reflektimi për të gjithë besimtarët.
Manifestimi qendror u mbajt në Xhaminë e Madhe në Prishtinë, ku qindra besimtarë u mblodhën që në orët e hershme të mëngjesit. Ceremonia nisi me faljen e namazit të sabahut nga kryetari i Këshillit të BI-së së Prishtinës, Hetem ef. Sopjani, pasuar nga ligjërata tematike e kryeimamit të Ferizajt, Ibrahim ef. Beqiri.
Mesazhi i Myftiut Tërnava
Namazi i Fitër Bajramit u pri nga kryeimami i Bashkësisë Islame të Kosovës (BIK), Vedat ef. Sahiti. Ndërkaq, hytben kryesore e mbajti Myftiu i Kosovës, Naim ef. Tërnava, i cili përcolli mesazhe të fuqishme paqeje dhe uniteti.
Myftiu Tërnava u ndal veçanërisht te situata politike në vend, duke u bërë thirrje liderëve për unitet kombëtar. Ai nënvizoi se:
“Interesat e shtetit dhe të shoqërisë duhet të vihen gjithmonë mbi ato partiake apo personale.”
