BERGAMO, 21 prill 2026 – Pas dhjetë vitesh si shtyllë e mbrojtjes së Atalantas, Berat Gjimshiti mund t’i japë lamtumirën Bergamos këtë verë. Kontrata e 33-vjeçarit me klubin zikaltër po i afrohet fundit dhe, pa asnjë sinjal për rinovim nga asnjëra palë, e ardhmja e tij mbetet në pikëpyetje.
Situatën po e monitoron me kujdes Fiorentina, e cila po synon të forcojë repartin defensiv për sezonin e ardhshëm dhe e sheh kapitenin shqiptar si përforcimin ideal.
Gjimshiti mund të largohet si lojtar i lirë, çka e bën atë një objektiv mjaft joshës për “Violën”. Përvoja dhe qëndrueshmëria e tij e gjatë në Serinë A e bëjnë atë një shtesë të vlefshme për çdo ekip, duke i ofruar Fiorentinës siguri në mbrojtje dhe udhëheqje në fushë.
Pavarësisht këtij interesi, ende nuk ka një marrëveshje përfundimtare dhe Gjimshiti vazhdon të jetë i përqendruar në ndeshjet e mbetura të sezonit me Atalantën. Vendimi përfundimtar pritet të merret pas përfundimit të kampionatit.
