Në Kampionatin Botëror të vitit 2002 në Japoni dhe Korenë e Jugut, braziliani legjendar Ronaldo, përveç golave të tij, u kthye në temën numër një në botë edhe për shkak të stilit të tij të pazakontë të flokëve. Ky model bëri xhiron e botës dhe mbeti në mbajtë mend si një nga më të çuditshmit në historinë e Botërorëve.
Kampionati Botëror është ngjarja më e madhe sportive në planet. Gjatë asaj periudhe, i gjithë fokusi i botës zhvendoset te futbolli, prandaj disa lojtarë, përveç lojës dhe rezultatit, i kushtojnë rëndësi edhe pamjes së tyre në fushë.
Shumë futbollistë janë përpjekur të lënë gjurmë me dukjen e tyre autentike dhe sigurisht që ia kanë dalë. Përveç golave, ndeshjeve të paharrueshme, lëvizjeve spektakolare dhe skandaleve, sot kujtojmë edhe krijimet e pazakonta që u „mbajtën“ mbi kokë nga disa aktorë të Botërorit.
Tifozët e futbollit ende e kujtojnë modelin e flokëve të bullgarit Trifon Ivanov, bishtin e kalit të Roberto Baggio-s apo flokët e Valderrama-s… Por, buzëqeshja më e madhe u vjen kur kujtojnë modelin shokues të flokëve të brazilianit legjendar Ronaldo.
Suksesi i madh pas modelit më të shëmtuar
Besojeni ose jo, ai model flokësh i solli fat dhe vetëbesim për të shkëlqyer atëherë kur duhej më së shumti. Ky futbollist fenomenal shënoi tetë gola në atë kampionat, dy prej të cilëve kundër Gjermanisë në finale, duke ia sjellë trofeun Brazilit. Ai ishte golashënuesi më i mirë dhe ylli kryesor i Botërorit.
Shumë vite më vonë, asi i njohur zbuloi se si ky imazh i pazakontë e ndihmoi të arrinte qëllimin e tij.
Ronaldo kishte rruar të gjithë kokën, duke lënë vetëm pak flokë sipër ballit, dhe ky model qesharak u bë kryetema e mediave botërore.
Plani pas ndryshimit të pamjes: Largimi i presionit nga lëndimi
Më vonë, ai shpjegoi se thjesht dëshironte të tërhiqte vëmendjen e mediave nga një problem serioz që po e mundonte gjatë Botërorit. Braziliani kishte qenë jashtë fushave për shkak të një lëndimi muskulor dhe forma e tij ishte në qendër të kritikave të opinionit publik.
„Po kthehesha nga një lëndim dhe isha vetëm 50-60 për qind i gatshëm. Para fillimit të kampionatit, mediat shkruanin vetëm për lëndimin tim dhe kjo krijonte presion shtesë mbi mua. Prandaj vendosa të ndryshoja modelin e flokëve për t’i larguar njerëzit nga ato histori. I pyeta bashkëlojtarët se si u dukeshin flokët e mi dhe të gjithë më thanë se ishin të tmerrshëm. Megjithatë, plani funksionoi. Kur erdha në stërvitje, historia e lëndimit u zhduk dhe lindi një e re, këtë herë për flokët e mi. Nuk kishte më spekulime nëse isha gati të luaja apo jo, gjë që ma lehtësoi shumë punën, edhe pse u turpërova pak me atë pamje“, ka zbuluar i famshmi i njohur si „Fenomeni“ (Zuba).
Ndjesa për të gjitha nënat
Modeli i flokëve ishte i tmerrshëm, por fëmijët në mbarë botën filluan të kopjonin idhullin e tyre. Për këtë arsye, Ronaldo më vonë u kërkoi falje publike të gjitha nënave që u desh ta duronin atë pamje te djemtë e tyre.
„Ju kërkoj falje të gjitha nënave, djemtë e të cilave i prenë flokët në atë mënyrë për shkakun tim“, deklaroi ndër të tjera ish-asi brazilian.
