Një shtetas shqiptar, i identifikuar si Liridon Kastrati, 32 vjeç, doli para Gjykatës së Lartë në Paisley pas një ngjarjeje të ndodhur më 6 maj 2024 në Renfrewshire, ku ai akuzohet se shkaktoi një situatë të rrezikshme për policinë.
Sipas dosjes gjyqësore, Kastrati dyshohet se kishte marrë një automjet Volkswagen të zi pa autorizim dhe e kishte drejtuar me shpejtësi të lartë. Gjatë ndjekjes, ai dyshohet se humbi drejtimin e makinës dhe u përplas me një automjet policie në të cilin ndodheshin dy oficerë.
Pas përplasjes, prokuroria pretendon se ai nxori një mjet prerës motorik (motorsharë) nga një çantë dhe u afrua drejt policëve duke bërtitur. Oficerët Gary Cowan dhe Kelly Ferris u transportuan në Spitalin Universitar Queen Elizabeth në Glasgow, ku morën trajtim për lëndime të lehta në qafë.
Kastrati përballet me akuza për tentativë vrasjeje ndaj katër oficerëve, shkelje të rendit publik dhe drejtim të pasigurt të automjetit. Megjithatë, prokuroria ka tërhequr katër pika të padisë.
Në deklaratën e dhënë para hetuesve, ai ka thënë se përplasja ishte rezultat i humbjes së kontrollit mbi makinën dhe se mjetin prerës e kishte përdorur vetëm për “t’i trembur” policët. Gjykata u njoftua gjithashtu se ai kishte pasur vështirësi me anglishten dhe se nuk i ishte ofruar as përkthyes në shqip dhe as avokat në momentet paraprake pas ndalimit.
