SHKUP, 23 Janar 2026 – Rajoni i Ballkanit Perëndimor pritet të përballet me një paralizë totale të qarkullimit të mallrave duke filluar nga dita e hënë. Shoqatat e transportuesve nga Maqedonia e Veriut, Serbia, Bosnja dhe Hercegovina dhe Mali i Zi kanë njoftuar bllokadë të plotë të pikave kufitare, në shenjë revolte kundër rregullave të reja të Bashkimit Evropian për llogaritjen e ditëve të qëndrimit të shoferëve në zonën Shengen.
“Kamionët do të parkohen në kufi”
Sipas paralajmërimit, bllokada do të nisë të hënën në mesditë dhe do të përfshijë të gjitha hyrjet dhe daljet drejt BE-së dhe tranzitin rajonal. Ndërsa autobusët dhe makinat private do të lejohen të qarkullojnë, transporti i mallrave do të ndalet plotësisht.
Biljana Muratovska nga shoqata “Makam-trans”, ka lëshuar një paralajmërim të frikshëm për pasojat:
“Do të kemi rënie të të gjithë ekonomisë së rajonit. Çmimet e transportit do të rriten tre deri në katër herë, ndërsa raftet e dyqaneve tona rrezikojnë të mbeten të zbrazëta.”
Shoferët trajtohen si “kriminelë”
Shkak i kësaj revolte është sistemi i ri elektronik i BE-së që pritet të nisë më 10 prill, i cili numëron në mënyrë strikte ditët e qëndrimit (90 ditë brenda 180 ditëve). Transportuesit thonë se kjo rregull, e krijuar për turistët, po shkatërron punën e tyre.
Situata tashmë është e tensionuar; raportohet se rreth 100 shoferë ballkanas janë deportuar nga vendet e BE-së dhe dhjetëra të tjerë kanë përfunduar në paraburgim për tejkalim të ditëve të qëndrimit. Muratovska e cilëson këtë trajtim si degradues, duke theksuar se shoferët po trajtohen sikur të ishin kriminelë apo migrantë ilegalë.
Shkupi dhe Brukseli në kurs përplasjeje
Ministri i Transportit, Aleksandar Nikolloski, e ka quajtur problemin si “vërtet serioz”, por pranoi se bisedimet me Brukselin deri më tani kanë dështuar. Komisioni Evropian ka mbajtur një qëndrim të ngurtë, duke deklaruar se rregullat nuk kanë ndryshuar, një argument ky që sipas Nikolloskit është “formalisht korrekt, por praktikisht i paqëndrueshëm” pasi shoferët nuk janë turistë.
Nëse nuk arrihet një marrëveshje e minutës së fundit, e hëna mund të shënojë fillimin e një krize furnizimi që do të godasë rëndë konsumatorët në të gjithë rajonin.
