Banka Popullore e Maqedonisë së Veriut (BPMV) ka konfirmuar sigurinë dhe cilësinë e rezervave të arit të vendit, të cilat ruhen në thesarin e Bankës së Anglisë në Londër, përcjell TV21.
Gjatë një vizite zyrtare, guvernatori Trajko Sllaveski dhe ekipi i tij realizuan një kontroll të drejtpërdrejtë mbi ruajtjen e arit monetar, një praktikë rutinë për të garantuar standardet më të larta të sigurisë në institucionet financiare qendrore.
Sasia dhe vlera e rezervave
Republika e Maqedonisë së Veriut zotëron rreth 6.9 tonë ari monetar, me një vlerë tregu aktuale prej rreth 800 milionë eurosh.
Gjatë inspektimit, ekipi i BPMV-së kontrolloi vizualisht shufrat e arit dhe konfirmoi se ato përputhen me numrat serialë dhe përmbushin specifikimet standarde.
Cilësia dhe standardet
Ari është i alokuar dhe përmbush kriteret e tregut të Londrës (London Good Delivery Standard), që garanton një përqindje të pastërtisë prej minimum 99.5% ar të pastër.
Vendimi për ruajtjen e rezervave në Bankën e Anglisë u mor në vitin 2010, duke u bazuar në sigurinë, fleksibilitetin e infrastrukturës së bankës dhe qasjen në tregun më të madh të arit në botë.
Përdorimi dhe menaxhimi i rezervave
BPMV thekson se përveç ruajtjes së vlerës, rezervat mund të gjenerojnë të ardhura monetare shtesë përmes depozitave afatshkurtra dhe transaksioneve me ari.
Banka Popullore siguron se do të vazhdojë të menaxhojë rezervat valutore dhe ari në mënyrë të përgjegjshme dhe transparente, duke mbështetur stabilitetin dhe zhvillimin ekonomik të vendit.
