ÇEGRAN – Klubi Futbollistik Arsimi ka nxjerrë një njoftim zyrtar përmes të cilit fton të gjithë anëtarët, sponsorët, përkrahësit dhe veçanërisht bashkatdhetarët nga diaspora që të marrin pjesë në Mbledhjen e Përgjithshme të klubit. Ky takim i rëndësishëm do të organizohet në Zvicër, më 20 qershor 2026, duke filluar nga ora 20:00.
Nga kryesia e klubit theksohet se diaspora ka qenë gjithmonë një nga shtyllat më të forta dhe jetike për rrugëtimin e KF Arsimit. Mbështetja dhe përkushtimi i vazhdueshëm i mërgatës kanë qenë vendimtare në sukseset e deritanishme, andaj zëri dhe pjesëmarrja e tyre vlerësohen si tejet të rëndësishme për hapat e radhës.
Pikat kryesore të diskutimit:
-
Zhvillimi dhe organizimi i ardhshëm: Strukturimi i brendshëm dhe strategjitë për rritjen e klubit.
-
Anëtarësimet dhe partneritetet: Mundësitë e reja për t’u bërë pjesë aktive e strukturave mbështetëse.
-
Sponsorizimet: Fuqizimi i stabilitetit financiar përmes bashkëpunimeve të reja.
-
Plani afatgjatë: Hapat konkretë që do ta bëjnë KF Arsimin një konkurrent edhe më të fortë në skenën futbollistike.
“Të bashkuar e bëjmë klubin më të fortë. Të bashkuar ndërtojmë të ardhmen e KF Arsimit. Çdo ide, çdo mbështetje dhe çdo kontribut ka vlerë”, thuhet në thirrjen e klubit drejtuar tifozëve dhe dashamirëve të sportit.
Nën moton “Një klub. Një familje. Një e ardhme”, KF Arsimi synon që përmes këtij bashkëbisedimi me diasporën në Zvicër të konsolidojë radhët dhe të projektojë me hapa të sigurt sezonin e ri dhe projektet e rëndësishme infrastrukturore e sportive që e presin klubin nga Çegrani.
