Bardhyl Mahmuti, bashkëthemelues i Partisë Demokratike të Kosovës (PDK), ka bërë thirrje për uljen e tensioneve politike dhe krijimin e një klime bashkëpunimi në prag të zgjedhjeve të jashtëzakonshme më 28 dhjetor.
Ai theksoi se sfidat me të cilat përballet Kosova kërkojnë një “konsensus minimal për çështjet jetike” dhe bëri apel drejtuesve të partive që të anashkalojnë inatet personale në interes të vendit.
Mahmuti kërkoi që udhëheqja e PDK-së të tregojë gatishmëri për bashkëpunim të gjerë, duke përfshirë figurat historike të partisë, përfshirë ish-komandantin e UÇK-së dhe themeluesin e PDK-së, Fatmir Limaj. Ai shprehu shqetësim për zërat se Limaj mund t’i mohohet mundësia për të qenë pjesë e listës së përbashkët për zgjedhjet e ardhshme, duke theksuar se “ata që i fryjnë idesë për t’ia mbyllur dyert Fatmir Limajt, nuk ia duan të mirën as PDK-së, as Kosovës.”
Në përfundim, Mahmuti uroi që drejtuesit legjitimë të PDK-së të përballen me sfidat aktuale, duke përfshirë edhe procesin gjyqësor në Hagë, të cilin e quajti “padrejtësi shekullore”.
