Kryeministri i Kroacisë, Andrej Plenkoviq, ka uruar liderin e Lëvizjes Vetëvendosje (LVV) dhe kryeministrin në detyrë, Albin Kurtin, për rezultatin e arritur në zgjedhjet parlamentare. Përmes një mesazhi zyrtar, Plenkoviq ka riafirmuar mbështetjen e palkundur të Zagrebit për integrimin evropian të Kosovës.
Kreu i qeverisë kroate theksoi se vendi i tij pret një konstituim të shpejtë të institucioneve të reja në Prishtinë, me qëllim që të vijojë pa vonesa bashkëpunimi i ngushtë dypalësh.
Mesazhi i plotë i kryeministrit kroat:
“Urime Kryeministrit Albin Kurti për rezultatet e zgjedhjeve. Kroacia mbetet e përkushtuar fuqimisht në mbështetjen e rrugës evropiane të Kosovës dhe ne presim formimin e shpejtë të institucioneve shtetërore për të vazhduar forcimin e bashkëpunimit tonë dypalësh në të gjitha fushat me interes të ndërsjellë”, shkroi Plenkoviqi.
Forcimi i raporteve Prishtinë–Zagreb
Kroacia konsiderohet tradicionalisht si një nga aleatët më zëshëm të Kosovës brenda Bashkimit Evropian dhe strukturave të tjera ndërkombëtare. Ky urim i Plenkoviqit rikonfirmon vullnetin politik të Zagrebit zyrtar për të thelluar marrëdhëniet diplomatike, ekonomike dhe të sigurisë, sapo ekzekutivi i ri të marrë zyrtarisht mandatin.
