Struktura e Posaçme kundër Korrupsionit dhe Krimit të Organizuar (SPAK) ka ndërmarrë veprime arrestuese që në orët e para të mëngjesit të sotëm në Shqipëri.
Sipas burimeve të konfirmuara për BalkanWeb nga gazetarja Klodiana Lala, SPAK ka lëshuar urdhërarrest për Ergys Agasin. Po ashtu, është caktuar masa e sigurisë “arrest me burg” për biznesmenin Ermal Beqiri, ndërsa për Mirlinda Karçanajn është vendosur masa “arrest shtëpie”.
Kujtohet se në muajin qershor, me urdhër të SPAK, janë ushtruar kontrolle në banesat dhe ambientet e biznesit të Ergys Agasit. Dy grupe hetuesish të Byrosë Kombëtare të Hetimit (BKH), të asistuar nga Policia e Shtetit, kanë kryer kontrolle në katër lokacione, përfshirë banesa në Tiranë dhe Durrës, si dhe zyra biznesi në pronësi të Agasit.
Hetimet vijojnë, ndërsa SPAK nuk ka dhënë ende detaje zyrtare mbi akuzat konkrete apo fazën procedurale të çështjes.
