01.04.2026 – Presidenti amerikan Donald Trump ka deklaruar se Shtetet e Bashkuara do të largohen nga Irani “shumë shpejt”, edhe nëse nuk arrihet një marrëveshje zyrtare me Teheranin.
Në një konferencë për media nga Zyrja Ovale, Trump tha se operacionet ushtarake amerikane mund të përfundojnë brenda “dy ose tre javësh”, duke theksuar se objektivat kryesore janë përmbushur.
Sipas tij, SHBA-të kanë arritur të kufizojnë aftësinë e Iranit për të zhvilluar armë bërthamore, në bashkëpunim me Izraelin, dhe aktualisht ndodhen në fazën e “përfundimit të punës”.
Trump deklaroi se SHBA-të dominojnë hapësirën ajrore iraniane dhe se pas vrasjes së disa udhëheqësve të lartë, ka ndodhur një ndryshim regjimi. Ai i përshkroi drejtuesit e rinj si “më pak të radikalizuar” dhe “më racionalë”.
Presidenti amerikan shtoi se udhëheqësit iranianë po “luten për një marrëveshje”, ndonëse ky pretendim është mohuar nga autoritetet iraniane.
Ai theksoi se lufta mund të përfundojë edhe pa një marrëveshje të ndërmjetësuar, ndërsa për çmimet e karburantit, premtoi se do të ulen sapo të përfundojnë veprimet ushtarake.
